آندھراپردیش میں مسلمانوں کوانکی آبادی کے لحاظ سے 8فیصد تحفظات کا مطالبہ

آج مسلم انٹلکچول فورم اور یوتھ ویلفیر اسوسی ایشن وجئے واڑہ کے ارکان نے چیف منسٹر آندھراپردیش مسٹر این چندرا بابو نائیڈو سے ملاقات کرتے ہوئے کاپو طبقہ کو تحفظات کے معاملہ میں فوری طور پر حرکت میں آنے کی طرح مسلمانوں کو بھی ریاست آندھراپردیش میں انکی آبادی کے لحاظ سے 8فیصد تحفظات ‘ اور ریاستی کابینہ میں مسلم لیڈر کو جگہ دینے کا مطالبہ کیا تاکہ سرکاری سطح پر مسلمانوں کی بھر پور نمائندگی ہو۔ انہوں نے دو دن پہلے پریس کانفرنس سے خطاب کرتے ہوئے اس بات کا بھی



مطالبہ کیا کہ آئندہ سالانہ بجٹ میں ایک ہزار کروڑ اقلتوں کے لئے مختص کئے جائیں اور جتنے آندھراپردیش کے اقلیتی ادارے ہیں ان تمام کے لئے حکومت بر وقت فنڈس جاری کرے ۔چنانچہ چیف منسٹرچندرا بابو نائیڈو نے انہیں آج وجئے واڑہ کے کیمپ آفس میں ان کو بات چیت کے لئے طلب کیا۔ ملاقات کے بعد یوتھ ویلفیر اسوسی ایشن کے صدر فاروق شبلی نے کہا کہ چیف منسٹر چندرا بابو نائیڈو نے انکے مطالبات پر مثبت انداز میں رد عمل ظاہر کیا ۔ اور انہوں نے تیقن دیا کہ انکی حکومت مسلمانوں کے مسائل کو حل کرنے کے لئے پوری طرح سنجیدہ ہے۔